अपर्णा ताई लाकडी बैलगाड्या, लाकडी खलबत्ते व इतर लाकडी वस्तू बनवून विकतात. हा व्यवसाय सुरु करण्यामागे त्यांची एक प्रेरणादायी व संघर्षमय गोष्ट आहे. लग्नानंतर काही वर्षातच लाईटचा शॉक लागून मुलगा गेला. असा जीवघेणा प्रसंग आयुष्यात येतो न येतो तोच सासरच्या मंडळींनी या परिस्थितीतही त्यांच्यावर आळ घेतला की हे तूच केलंय. नवऱ्यासहित सासरच्या सर्व मंडळींनी त्यांची साथ सोडली. अशा कोलमडलेल्या अवस्थेत त्या धडपडत उभ्या राहिल्या, स्वत:ला सावरलं आणि उसने पैसे घेऊन बचत गटाच्या माध्यमातून स्वतःचा व्यवसाय सुरु केला. आज या बैलगाड्या त्या सुतार काकांकडून बनवून घेतात, त्याला स्वतः रंग देऊन त्या विकतात, त्यातून मिळणारा पैसा आणि आत्मविश्वास जगायला बळ देतो असं त्या सांगतात. प्रचंड वेदना देणारा संधीवाताचा त्रास त्याचा औषधखर्च, मानसिक त्रास या सगळ्यांवर त्या आज या बचत गटातून सुरु केलेल्या उद्योगामुळे मात करु शकल्या.